• 11 yanvar, 16:40
• 0000, 00:00

Dəhlizlərdə gölməçələr artdıqca daha çox sinif otağı kilidlənir – Mirqurbanlı məktəbi

Bura Neftçala rayonunun Mirqurbanlı kəndinin T. İsmayılov adına tam orta məktəbidir.

Belediyye.net kənd sakinlərinin şikayəti əsasında məktəbi kənardan götüntüyə alıb. Ona görə kənardan ki, məktəbin direktoru  hətta müəllimlərə də, məktəbin içindəki rütubəti, göyərib kif bağlamış divarları, divarların artıq çoxdan uçub tökülmüş suvağını çəkib paylaşmağı qadağan edib.

Yağış, qar yağanda məktəbin içində, böyük foye və dəhlizlərdə gölməçələr yaranır. Bu səbəbdən qapısı kilidlənən qəzalı siniflərin sayı artır.

Məktəbin akt zalında pəncərə şüşəsi görmək mümkün deyil. Məşq zalı kimi istifadə edilən zalın pəncərələri taxta ilə qapadılıb.

Təmirsiz olmasından əlavə məktəbin nə normal elektrik sistemi, nə də istilik sistemi var.

Şikayətçilər deyir ki, Mirqurbanlı məktəbində məktəb sözü ancaq kağız üzərində qalıb.

Vaxtilə adlı-sanlı məzunlarının olduğu Mirqurbanlı məktəbində 500 şagirdin təhsil aldığı deyilir.

“İctimai xadimlərindən tutmuş, adlı-sanlı adamları, rəssamına, aktyoruna qədər məzun yetişdirmiş bu məktəbin indi şagird sayı 180-ni keçmir. Əksəriyyət uşaqlarını taksi ilə başqa kəndlərə, yaxud rayon mərkəzindəki məktəblərə göndərir. Soruşanda da, məktəb qəzalı vəziyyətdədir, uçub-tökülür, məktəbdə dərs keçən yoxdur, deyirlər”, sakinlərdən biri bildirir.

Mirqurbanlı məktəbində olan bu acınacaqlı vəziyyət ilə heç bir qurumun maraqlanmadığı deyilir.

 Belediyye.net