• 25 yanvar, 00:06
• 0000, 00:00

Torpağı öz oğluna 49 illik icarəyə verən bələdiyyə sədri

Neftçala rayon Xolqaraqaşlı kənd sakinləri keçmiş bələdiyyə sədri Əlibala Səlimovun otlaq sahələrini qanunsuz olaraq icarəyə verdiyini, rüşvət müqabilində satdığını deyirlər.

Keçmiş sədr bununla da kifayətlənməyib bələdiyyə torpaqlarını hərraca çıxarmadan öz dostuna, tanışına, qohumuna, hətta öz oğlu Özal Səlimova uzunmüddətli icarəyə verib. Kənd sakinlərinin Belediyye.net saytına göndərdikləri sənədlərin görüntüsündən belə məlum olur ki, Əlibala Səlimov Xolqaraqaşlı Bələdiyyəsinə məxsus olan torpağın 27 hektarını 49 il müddətinə oğlu Özal Səlimova icarəyə verib.

Qanunla aşkarlıq şəraitində, hərrac keçirilərək icarəyə verilməli olan torpaq sahəsi kənd sakinlərinin iştirakı olmadan sənədləşdirilib. Halbuki, Azərbaycan qanunvericiliyinə görə Bələdiyyənin ehtiyat fondunun özəlləşdirilən torpaqları barədə alqı-satqı əqdləri, yerli normativlər nəzərə alınmaqla aşkarlıq şəraitində bağlanılmalıdır.

Qeyd edək ki, torpaq sahələrinin mülkiyyətə, istifadəyə və icarəyə verilməsinin ümumi qaydaları var. 

Torpaq sahəsinin bələdiyyə mülkiyyətində olan müəssisə, idarə və təşkilatların istifadəsinə və ya fərdi yaşayış evinin tikintisi üçün Azərbaycan Respublikası vətəndaşının mülkiyyətinə verilməsi barədə, habelə hüquqi və fiziki şəxslərin mülkiyyətinə (icarəsinə) verilməsi məqsədilə hərracın (müsabiqənin) keçirilməsi barədə bələdiyyənin qərarı sahənin xüsusiyyətinə və torpağın ayrılma məqsədinə, mövcud texniki normalara, habelə yerquruluşu və şəhərsalma sənədlərinə uyğun olaraq müvafiq icra hakimiyyəti orqanlarının rəyi alındıqdan sonra qəbul edilir.

Bu zaman ortaya belə bir fakt çıxır. Kənd camaatından xəlvət keçirilən sənədləşdirmə prosesinə İcra Hakimiyyəti orqanları rəy verib. Məlum olur ki, Əlibala Səlimovun dövlət əmlakının saxta yolla sənədləşdirilməsinə maraqlı olan İcra Hakimiyyəti orqanı, yaxud əməkdaşları var.

Xolqaraqaşlı kəndinin sakinləri bildirilər ki, üz tutmadıqları qurum, kömək istəmədikləri qapı qalmayıb. Lakin buna baxmayaraq biriləri Əlibala Səlimovu himayə edir.

Onlar bir hektar torpaq icarəyə götürə bilmədikləri halda Özal Əlibala oğlu Səlimov 27 hektarı uzunmüddətli icarəyə götürüb.

Qeyri-qanuni yolla, hərrac keçirilmədən, saxta sənədləşdirmə yolu ilə...

Xolqaraqaşlılar Əlibala Səlimovun qanunsuz əməli ilə ilk dəfə üz-üzə qalmadıqlarını deyirlər. Bundan öncə üç dəfə oğluna torpaq icarəyə verib. Birinci dəfə 9 ha, ikinci dəfə 16,7 ha, indi isə 27, 89 ha torpaq sahəsi qeyri-aşkarlıq şəraitində, hərrac keçirilmədən Özal Səlimovun adına sənədləşdirilib.

Kənd sakinləri haqları tapdandığını, saxta sənədləşdirmə prosesinin cinayət əməli olduğunu hesab edir, bu prosesdə iştirak edənlərin cəzalanmasını, haqları olan torpaq sahələrinin özlərinə qaytarılmasını tələb edirlər.

Xolqaraqaşlı sakinləri məsələni ictmailəşdirməklə haqqın yerini tapacağına ümid edirlər.

Belediyye.net